Page 32 - L'orsa

prencepe, che non ne poteva scennere lo
zuccaro, se ne leccaje le dejeta. E, comme appe
fornuto de cannariare, le deze a bevere co tanta
grazia, che la regina la vozo vasare nfronte.
Fatto chesso, e sciso lo prencepe a fare la preta
paragone de lo jodizio de li miedece, l’orza fece
subeto lo lietto; e, corzo a lo giardino, cogliette
na bona mappata de rose e shiure de
cetrangolo, e nce le aparpogliaje pe coppa.
Tanto che la regina disse che st'orza valeva no
tresoro, e ch’aveva no cantaro de ragione lo
figlio de volerele bene. Ma lo prencepe,
vedenno sti belle servizie, jonze esca a lo fuoco,
e, se, primma, se conzomava a dramme, mo se
strodeva a rotola; e disse a la regina: «Mamma
gnora mia, si non dongo no vaso a st'orza,
m’esce lo shiato!» La regina, che lo vedeva
ashevolire, disse: «Vasalo, vasa, bell’anemale
mio, non me lo vedere speruto sto povero
figlio!» Ed, accostatase l’orza, lo prencepe,
pigliatola a pezzechille, non se saziava de
vasarela. E, mentre stevano musso a musso, non
saccio comme, scappaje lo spruoccolo da vocca
a Preziosa, e restaje fra le braccia de lo
prencepe la chiù bella cosa de lo munno. Lo
quale, stregnennola co le tenaglie ammorose de
le braccia, le disse: «Ncappaste, shiurolo!; non
me scappe chiù senza ragione veduta!»

32